بيتي فور بسيط جدا...

السلام عليكم ورحمة الله وبركاته
اني اسفة جدا وعدت اني ح نكتب بس ظروف أخرتني
علي العموم انشاء الله ح نحاول اني نكتب كل اسبوع طريقة حلويات اقتصادية وبسيطة وتحضيرها سريع

اليوم ح نقولكم علي طريقة بيتي فور حلوة باش تشربو بيها شاهي العشية
المقادير
بانيو زبدة جديدة وتكون مش متجمدة يعني خليها بره الثلاجة قبل مابتدير البتي فور بساعة او ساعتين

طاسة سكر مرحي

بيضتين...

ودقيق مايعجن
طبعا وظرف بينج بودر وفانليا
وممكن تبشرى ليمة قارصه فيها باش تعطيك نكهة حلوة للبيتي فور
وشويه لوز مهروش

الطريقة
تاخدى الزبدة وتحطيها في صنية وتحطي فوقها السكر المرحي وتأخدى صفار البيض بس تحطيه فوق منه وتخلي البياض بروحه وبعدين تأخدى الفانليا ومبشور الليم وتخلطي مع بعض
وبعدها تأخى الدقيق وتحطي بالشويه مع البيكنج بودر وتخلطي لين العجينة معاش تلصق في ايديك يعني ماتخليش العجينة يابسة خليها رطبه
وابدى كركبي في العجينة زى الغريبه وخودى الكركوبه وغطسيها في بياض الدحي وبعدين في اللوز المهروش وديرى فتحة في الوسط
واستمرى لين تكملي العجينة وحطيها في الفرن لمدة من 7 الي 10 دقايق لين تحمر ولما هي في الفرن افتحي ونزلي الحفرة اللي في الوسط وبعد مايطيب خودى مربي متع فراوله وحطيها في الفتحة اللي في الوسط
وتأكلي بالهني


منتهى