هموم بوكبوط
بوكبوط ضخم الجته طوله في المتر وتمنين والعرض متر تقريبا قولو مشاء الله ومسميين بوكبوط لان مينحيش فيه لا في الصيف ولا في الشتاء وديما ينقرز ماعجبا شىء اليوم مع العصرية جاني وحواجبا مقرونات وزي العاده يلعتب في سبسي الرياضي حتى شنباته موليين صفر قعمزنا تحت التوته والبراد يركرك على النار قريب من الصبح صبيتله طاسه شفط منه شفطه طويلة وقالي تو عجباتك هالدنيا قتله خيرها قالى ياراجل نوط من فجر ربي وأول متشوف قدامك المراه حواجبها مقرونه وموتيتلك قائمه بالحاجات المطلوبة للحوش وهي تعرف الجيب فاضى ولي خمسه شهور مخلصتيش ولما تسقدك تقولك متنساش في طريقك طلع الكناسة وأنت طالع وانا نحط في مخلتي على طهري ونقيم في ألكناسه شفته القطوسه تشبحلي في شبحه كانها بتقولي يحيف على الرجاله !!!
بوكبوط عنقر طاقيته ومد ايده ليأخدالسبسي الي على ودنه ولعه وخدي من جبده طويلة حبسها في صدره وتنهد وقالي المهم تجيبني الطريق نخطم اول شي على قهوة عمك عبسلام نلقى التيحا وجماعتها مديرين دوشه على الكورة ناقصها غير الضرب نشرب قهوتي ونقوله سجلها على الحساب فيخط خط تاني تحت اسمي على الحيط
وبعدها نمشي للسوق نأجر برويطه لنخدم عليها وفي السوق تلقى الىيبيعو كل واحد يجبد في الزبائن من جهة واحد يبيع الطماطم يدينار وربع والتاني بدينار بس وكان جو البلديه يولي سعرها بخمسه وسبعين بس والناس تشري وتعبيي في البراويط ميخلو في شي منين يجيبو في الفلوس الله اعلم ونقعد في السوق الى بعد المغرب يدوب نحصل عشرة دينار نشري حاجتين تلاته من قائمة المراه ونروح ونحصل منها شوي تنقريز ويدوب نلحق على العشاء وعيوني مغمضات ويتنهد ويقول ما جوبتنيش عجباتك هالدنيا .
الثلاثاء مايو 12, 2009 11:43 pm
